عدم الثقة بالنفس عند الأطفال

عدم الثقة بالنفس عند الأطفال

لو إبنى مش واثق فى نفسه أعمل أية ؟َ!

تعالوا نشوف الإجابة مع الأستاذة منى جابر وكيفية التغلب على مشكلة عدم الثقة بالنفس التي تواجه أطفالنا:

جمل كتير أولادنا ممكن يقولوها زي " أنا فاشل, أنا مش شاطر, مش عارف أحلها, دي صعبة أوي".

رغم إن كلها جمل سلبية لكن هي في الحقيقة تعتبر الترمومتر اللي بيساعدنا نعرف أولادنا شايفين نفسهم إزاي!

1 - إسأل نفسك إنت شايف نفسك إزاي كـ أب و كـ أم ؟

لأن أوقات كتير انطباعتنا السلبية عن نفسنا بتوصل لأولادنا من غير ما نقصد وبتبقى جزء من شخصيتهم.

2 - بلاش تقارن ابنك بأي شخص تاني.

وخليك عارف ان عمر ما هيكون في اتنين زي بعض وعشان كده دور مع ابنك على كل الحاجات اللي بتميزه عن غيره وساعده ان يصدقها.

3 - اتكلم عنه وعن إيجابياته

خليه يصدق إنك فخور بيه, اتكلم عنه وعن انجازاته حتى لو كانت انجازات بسيطة.

4 - خصص وقت للحديث معه عن نفسه.

شجعه أنه يتكلم عن نفسه وعن مواقف مر بيها, و أوضح له الجانب الإيجابي في تصرفاته.

5 - اشكر ابنك.

اشكر ابنك على الحاجات الصغيرة اللي بيعملها لأن دا بيوصله رسالة انه يقدر يعمل حاجات تستحق التقدير والشكر.

6 - علم ابنك مهارات الإستقلال:

حاول انك تخليه يساعدم في البيت, أو انه يكون مسئول ولو مسئولية جزئية عن بعض المهام.

اشكره على المهام اللي قدر ينجزها حتى وان لم تكن على أكمل وجه

تابع القراءة

التبول اللاإرادي عند الأطفال وكيفية علاجه

تابعوا مع الأستاذة منى جابر أخصائية العلاج النفسي للأطفال والإرشاد الأسرى كيفية علاج مشكلة التبول اللاإرادي عند الأطفال

عشان نتغلب على مشكلة التبول اللاإرادي هنحتاج نعمل مع بعض مجموعة خطوات

خليك متأكد ان إبنك نادراً ما بيعمل حمام على نفسه عن قصد .. ولو حصل وعمل حمام على نفسه بيبقى حاسس بالخجل ومكسوف جداً من نفسه.

بلاش تفضحه أمام إخواته لأن دا بيأثر على صورته عن نفسه وبيفقده ثقته في نفسه وبيخلي المشكلة تزيد مش تقل.

بدل ما تزعق له .. ساعده أنه يبدل هدومه ويغير ملاية السرير اللي اتبلت.

واشكره لأنه غير هدومه بنفسه وساعدك تبديل الملاية.

قلل السوائل قبل النوم بخمس ساعات.

يعني مينفعش تقول للإبنك متشربش بيبس أو عصير قبل النوم وانت بتشرب قدامه.

شجعه يدخل الحمام قبل مينام.

لاحظ إبنك أثناء النوم .. لأن الملاحظة هتساعدك تعرف الأوقات اللي ابنك بيعمل فيها حمام على نفسه وسجلها عندك في ورقة.

شجع إبنك انه يدخل الحمام في الأوقات اللي في الخطوة السابقة أنت لاحظتها, ويفضل يدخل الحمام قبل المعاد المحدد بـ من دقيقة : دقيقتين.

لازم ابنك يكون فايق عشان المخ يقدر يربط بين الصحيان بالليل ودخول الحمام.

كافئه لو قدر يتحكم في الحمام ولو معرفش قل له "أنا متأكد انك هتعرف المرة الجاية".

والأهم من كل الخطوات اللي فاتت انكم تحافظوا على بيت صحي ليكم ولأولادكم .. يعني هنحاول نقلل الزعيق و التكشيرة والصوت العالي.

دي مجموعة من الخطوات للتحكم في التبول الليلي.. لكن لو المشكلة استمرت هتحتاج تزور متخصص عشان يقولك سبب المشكلة عند ابنك ويساعدك تتغلب عليها في وقت قصير.

تابع القراءة